Ky është një moment i rrallë i një zyrtari serb që nuk e njeh pavarësinë e Kosovës.
Zyrtari ndërlidhës, ose ambasadori i Serbisë në Prishtinë, sipas perceptimit lokal, Dejan Paviqeviç, ka qenë personalisht në ambientet e qeverisë së Kosovës, raporton KTV.
Këtë e ka bërë për t’u pajisur me një kartë të posaçme identifikimi.
Kohavision ka siguruar aplikimin që Paviqeviç ka bërë në Zyrën e Kryeministrit të Kosovës për një bexh.
Ai ka dhënë të dhënat e tij personale, por në vend të pasaportës, ka përdorur letërnjoftimin.
17 qershorin 2013 e ka shkruar si datë të hyrjes së tij në Kosovë dhe zyrën në ndërtesën e Bashkimit Evropian, në rrugën e Kosovës.
Bashkë me shefin Paviqeviç, kërkesë të njëjtë te zyra e Thaçit kanë bërë edhe dy zyrtarë të tjerë serbë, Predrag Nikoliç dhe Milos Ris.
Kërkesa e të tre zyrtarëve serbë është protokolluar më 11 mars. Akti duket të jetë një zbutje e qëndrimit të Paviqeviçit, që ka thënë se nuk i njeh institucionet e Kosovës./KD