Transmetimi i disa pamjeve filmike nga televizioni News24 brenda ambienteve të Drejtorisë së Përgjithshme të Tatimeve në ditët kur është bërë edhe ndërhyrja në serverat e këtij institucioni, ka sjellë shumë reagime.
Në pamje duket se si në ambientet e DPT futet deputeti i LSI, Spartak Braho dhe një zyrtar i Ministrisë së Financave, Ermal Beqiri, që i përket grupit të auditit.
Çështja është nën hetim, ndërkohë që mbetet sërish e paqartë se çfarë ka ndodhur me serverat.
PD pretendon se janë vjedhur më shumë se 4.3 milionë deklarata tatimore.
Kurse vetë drejtoresha e DPT, Briseida Shehaj ka përsëritur për News24 se serverat nuk janë fshirë, pasi të dhënat janë ruajtur.
Ministria e Financave nga ana e saj e ka quajtur këtë një shfaqje mediatike.
Në një reagim për shtyp thuhet se “ka qenë pikërisht DPT, përmes drejtores, që këtë ndërhyrje flagrante e ka paditur në Prokurori”.
“Kjo çështje është aktualisht nën hetim dhe Ministria e Financave është në pritje të zbardhjes së plotë nga organet hetimore të problematikës së konstatuar prej nesh”, vijon njoftimi i MF.