Pas ngjarjes makabër, Kunati ju vu punës të mblidhte të dhëna rreth dosjes së autorit të dyshuar për t’i përdorur publikisht. Njerëzit e tij në shtet filluan të raportojnë të dhënat.
I pari i raportoi njeriu i tij në qarkulim rrugor: Nga të dhënat tona, Konstandini kishte makinë të rregullt, të blerë në rregull, me doganë të paguar. Kishte kutinë e ndihmës së shpejtë, trekëndëshin, jelekun fosforeshent dhe pompën zjarrfikëse. Nuk kishte gjoba.
Pastaj raportoi njeriu i tyre në INUK: Konstandini nuk ka ndërtesë pa leje. Ai jeton në një shtëpi të vjetër me hipotekë, nuk ka shtesa dhe nuk ka bllokuar ndonjë rrugë kalimi.
I treti raportoi njeriu i tyre në CEZ: Konstandini është korrekt me faturat e energjisë elektrike. Edhe pse mbahet si i fortë, nuk ka bërë lidhje të paligjshme.
Kunati i shikonte dhe tërbohej.
-Çi kam këta tuhafë, tha, më raportojnë vetëm gjëra pozitive për këtë?
Atëhere thirri Tom Ndrecën, të vetmin që i ka mbetur në gjykatë që nga zgjedhjet e Bashkisë.
-Më jep ndonjë të dhënë për këtë Konstandinin, i tha.
-Nga gjykata është korrekt, tha. Është akuzuar për një vrasje, por me sa kam parë dosjen, ja kanë futur kot, se ai nuk e dinte që revolveri kishte plumb, dhe aq më tepër as që i shkonte mendja se plumbi do zinte shokun. As që bëhet fjalë të mendohet që shoku do vdiste nga plumbi i shokut të vet. D.m.th, si ta them unë, është plumb i gjetur jashtë kutisë, si fletët e votimit. Ndaj nuk i quajtëm.
I mërzitur dhe nga Ndreca, Kunati mori një prokuror.
-A ka ndonjë gjë negative ky Konstandini, i tha, se duhet t’i biem fort.
-Më negative se të vrasësh katër vetë, nuk ka, i tha prokurori.
-Këtë se themi dot, tha Kunati, se kjo shifra 4 të vrarë është ters, se duket sikur e themi dhe për Lulin dhe Doktorin më 21 Janar. Po ndonjë tjetër më të fortë?
-Jo, të tjerat i ka në rregull, i tha prokurori. Dritat i ka paguar, ndërtime pa leje s’ka, kutinë e ndihmës së shpejtë e ka, bile për siguri mbante dhe pistoletë me vete.
-Ah, ja këtu të kapemi, tha Kunati. Se Luli dhe Saliu s’kanë qenë të armatosur atë ditë që vranë. Këtu e bëjmë diferencën. Do t’i bëjmë copë.