Intervistë për TemA-n e Indrit Muratit, organizator përmes faqes online “SHQIPËRIA IME”, i protestës së djeshme tek blloku i ambasadave, për vrasjen e të dënuarit shqiptar në burgjet greke.
Si u instrumentalizua protesta juaj e djeshme?
Nisur nga faqja jonë në internet, u pa se në dy ditët e fundit të organizimit kishte shumë njerëz që po i bashkoheshin protestës për vrasjen barbare të Kudret Kumes në burgjet greke, dhe u afrua edhe Aleanca Kuqezi. Kreshnik Spahiu deshi t’a marrë përsipër si organizim. Madje them se edhe shkak i prishjes së protestës së djeshme ishte shkak politizimi i saj.
Me zotin Spahiu ju vetë komunikuat?
Po fola me të rreth 2 orë para protestës dhe një orë më pas.
U takuat me të?
Po u takova dhe rashë dakord që të mos politizohej tubimi dhe që të thuhej se organizatori i saj ishte “SHQIPERIA IME”. Unë pashë në media që nuk u përmend askund se kush e organizoi protestën, madje doli sikur organizatore ishte AK-ja.
Cilë ishte biseda e fundit me Spahiun?
I thashë se nuk jam përmendur askund si organizator. I pabesë. Ai më tha se nuk ishte marrë me protestën.
Ju, jeni dhunuar nga policia?
As unë dhe as aktivistët e “SHQIPERIA IME” nuk janë dhunuar. Nuk kemi asnjë lloj ankese për ushtrim dhune. Ne u larguam qetësisht pasi shkuam te muri i ambasadës greke.
AK-ja ka deklaruar se do të organizojnë një tjetër protestë nesër para Ministrisë së Brendshme. Do të jeni edhe ju pjesë e saj?
Jo, absolutisht jo. Ne nuk do të jemi pjesë e saj. Madje, “SHQIPERIA IME” nuk do të marë pjesë në asnjë protestë ku ka faktorë politikë. Ne do të protestojmë vetëm për flamur dhe ndjenja patriotike.