Partia Demokratike ka thënë se shembja e 53 objekteve në Hudenisht të Pogradecit është bërë për qëllime klienteliste nga ana e kryeministrit Edi Rama.

Deputeti Gjergji Papa thotë se aty parashikohet një fshat turistik nga deputeti socialist, Ilir Xhakolli.

“Shembja e pasurisë së 53 familjeve në Hudenisht, në kundërshtim me ligjin, pa procedurë, në shkelje të të drejtës themelore të pronës, bëhet për arsye klienteliste e korruptive të Edi Ramës.

Shtëpitë, hotelet, dhe pasuritë e qytetarëve, po prishen për t’i hapur rrugë investimit, fshatit turistik të kryetarit të Partisë Socialite për Pogradecin dhe deputetit të Edi Ramës, Ilir Xhakolli.

Ja pra kush është e vërteta.

Kemi këtu vendimin për dhënien në përdorim të tokës që i jep të drejten deputetit të Edi Ramës për të ndërtuar një ambjent per aktivitet turistik me sipërfaqe 45 mijë metra katrorë.

U prishet me dhunë prona e ligjshme qytetarëve, pa paraqitur asnjë shkresë zyrtare, për të pastruar terrenin për biznesin e qeveritarëve.

Njeriu i Edi Ramës jo vetëm e do gjithë Hudenishtin për vete, por nuk do as konkurencë.

Ky rekord korruptiv, ku dëbohen qytetarët e vendit nga pronat e tyre të ligjshme, për të favorizuar biznesin e Kryeministrit dhe deputetit të tij, po ndodh sot ditën për diell në sytë e qytetarëve.

Kjo është oligarkia në veprim, që merr përvetëson pasurinë publike, shkatërron pasurinë e qytetarëve, që nuk ndalet para asgjëje për interesat personale.

Edi Rama refuzoi në mënyrë të përsëritur të dëgjonte zërin e banorëve të Hudenishtit, që kanë investuar mundin e djersën e jetës, refuzoi të dëgjonte padrejtësinë që po u bëhej.

Po ja ku del e vërteta. Nuk kemi të bëjmë thjesht me arrogancën e zakonshme, me armiqësinë që kryeministri tregon ndaj qytetarëve. Por kemi të bëjmë me biznesin e tij dhe të deputetit të tij.

Ky korrupsion tronditës, nuk do të lejohet.

Ne ftojmë qytetarët ta kundërshtojmë me cdo mjet.

Partia Demokratike do të jetë në krah të tyre, dhe zotohet publikisht se do të mbrojë të drejtat e tyre deri në fund.

E keqja do të ndalet.

Askush nuk do të gëzojë frytet e zullimit më të pashembullt të Edi Ramës dhe klientelës së tij”, tha ai gjatë një konference për shtyp./b.l

Ajo është modele, prezantuese dhe një femër tërheqëse.

Por, Andressa Urach, 27 vjeç, ka rrezikuar të humbasë këmbën e saj.

Shkak për këtë është bërë një operacion plastik, me anë të të cilit ajo ka zmadhuar të pasmet, për të marrë pjesë në spektaklin e famshëm Miss Bum Bum, që zgjedh femrëm me të pasmet më të mira në Brazil.

Për shkak se për të zmadhuar të pasmet, mjekët i kanë marrë mish nga këmba, ajo për pak e ka humbur atë.

Kjo, duke qenë se gjatë ndërhyrjes pësoi një infeksion, çka e detyroi që të qendrojë një muaj në spital.

27-vjeçarja ka kryer edhe operacione të tjera plastike në trup, mes të cilëve edhe një për reduktimin e vaginës.

Ajo kohë më parë ka pretenduar se ka flejtur me Kristiano Ronaldon./b.l

Kryeministri Edi Rama ka reaguar pas çuarjes së ish-truprojës së ministres Lindita Nikolla në gjyq.

Rama ka inkurajuar qytetarët që të denoncojnë raste të tilla.

Sipas tij, vetëm kështu mund t’i jepet fund korrupsionit.

“Fillim tetorin e shkuar, ministrja e Arsimit Lindita Nikolla u njoftua për shqetësimin e një qytetari në Korçë, lidhur me ofertën e bërë prej truprojës së saj për t’i gjetur një punë në arsim përkundër rryshfetit.

Ministrja i kërkoi menjëherë Gardës së Republikës largimin e truprojes dhe Garda jo vetëm e tërhoqi atë brenda orës nga shërbimi pranë ministres, po e largoi edhe nga radhët e veta.

Sot ky individ i padëshirueshëm është nën akuzë konkrete nga Prokuroria pas një hetimi të thelluar.

Ai do të përgjigjet për abuzimin e tij me detyrën shtetërore si dhe cënimin e imazhit të institucionit.

Mora shkas nga ky episod per t’ju thënë se, sikur të gjithë qytetarët të veprojnë si qytetari korçar në fjalë, kudo dhe kurdoherë që u del përpara fara e keqe e abuzuesve me funksionin publik, Shqipëria do të marrë frymë shumë më e lehtësuar nga barra e korrupsionit.

Prandaj paralelisht me përshkallëzimin e reformave reale që mbyllin kanalet e korrupsionit në çdo sektor, ne duam që ky vit të shënojë edhe një kohë të re partneriteti kombëtar mes qeverisë dhe qytetarëve në luftën kundër korrupsionit! Për këtë qëllim prioritar, do të lançojmë në ditët në vijim platformën më të madhe online që është krijuar deri sot në vendin tonë, për ta mundësuar në kohë reale dhe me transparencë maksimale, funksionimin e këtij partneriteti të ri kombëtar.

Mirënjohje qytetarit korçar për ngritjen e zërit përballë një abuzuesi me funksionin publik!

Mirënjohje dhe atyre pak të tjerëve, të cilët kanë bërë të njëjtën gjë vitin e shkuar dhe na kanë ndihmuar të bëjmë edhe në tatime, polici, shëndetësi, të njëjtën gjë që bëri Lindita Nikolla në rastin konkret!

Le të shumëfishojmë forcat dhe së bashku, krah per krah të bëjmë të shumëfishohen rastet e bashkëpunimit të drejtpërdrejtë mes qeverisë e qytetarëve, për shkuljen e farës së keqe të abuzuesve me pozitën apo detyrën shtetërore.

Kurajo!

Edi”, thotë Rama./b.l

Një investigim i bërë nga Qendra Investigative e Gazetarëve në Serbi dhe  (CINS) dhe Projekti për Raportimin e Krimit dhe Korrupsionit (OCCRP) ka nxjerrë në dritë skandalin e kompanive të ndryshme në Ballkan, të cilat blejnë në vendet europiane,  çmime të kota “ndërkombëtare” dhe kupa cilësie.

Raporti i dy autorëve investigues Dragana Peco dhe Dino Jahiç ka demaskuar disa kompani farmaceutike në Serbi, por ky nuk është një fenomen i izoluar vetëm në një vend.

Në shkrim theksohet se: “Shumë institucione dhe individë në Ballkan pëlqen të tregojnë çmimet ndërkombëtare si provë  të arritjes së madhe të biznesit së tyre dhe cilësisë që ofrojnë.  Në shumë raste, këto çmime janë false, dhe shiten nga organizata te paskrupullta”.

(CINS) dhe  (OCCRP) ka zbuluar se mania për çmime e ka përfshirë rajonin që nga viti  2000, me qindra “nderime dhe kupa” të marra nga biznese dhe kompani të shumta ballkanase.

Taktika që ndiqet duket se është e thjeshtë; të gjithë ata që paguajnë mjaftueshëm mund të fitojë një çmim. Shumë fitues të këtyre çmimeve vijnë nga sektori publik,  gjë që do të thotë se paratë e paguara për çmime merren  nga buxheti  apo në fund të fundit nga xhepat e tatimpaguesve.
Këto çmime nuk merren lirë.
Në Serbi dhe Bosnjë e Hercegovinë, rreth 50 institucione publike kanë marë këto çmime. Disa kanë paguar  shuma që shkojnë nga 2,000 euro deri në  7,000 euro për çmim.

Çmimet e “Cilësisë” dhe “Prestigjit” kanë shkuar në Ballkan tek ato kompani, të cilat më vonë ose kanë falimentuar ose janë përballur me hetime të ndryshme.

Për shembull,  në Serbi kompania shtetërore farmaceutike Galenika u nderua në vitin 2009 me një nga këta çmime, por më vonë u bë subjekt i një hetimi dhe ndjekjeje penale. Dhjetë njerëz, përfshirë dy drejtorët e kompanisë të Galenika-s  u akuzuan në janar të viti  2014, me akuzat për mashtrim dhe përvetësim të  rreth 75.000.000 eurove.

 Kështu ndodhi edhe me ish drejtorin e Aeroportit të Sarajevës, Bakir Karahasanović dhe ish asistentin e tij , Elvedin Begiç, i cili mori një çmim për shërbimin cilësor të aeroportit.  
Në korrik të vitit  2014, Prokuroria e Sarajevës nisi një hetim kundër tyre, për shpërdorim detyre dhe se ksihin dëmtuar kompaninë duke bërë kontrata të dëmshme në kurriz të Aeroportit të Sarajevës.

Dy investiguesit më tej shpjegojnë se dhenia e ketyre çmimeve nderuese është një biznes mashtrues mjaft fitimprurës.

Organizatat që ofrojnë këto çmime janë me qendra gjithmonë në një nga vendet e Bashkimit Evropian dhe kryesisht tregu i tyre drejtohet tek vendet në zhvillim, përfshirë edhe ato në Ballkan.

Ato veprojnë gati në  mënyrë të njëjtë dhe nuk publikojnë  shumë informacione për veten e tyre.  Disa prej tyre ndryshojnë shpesh faqet në web ose hapin të reja vazhdimisht.

Kompanitë mashtruese ku investiguan  CINS dhe OCCRP ishin:

The Europe Business Assembly (EBA), Oxford, United Kingdom
The Business Initiative Directions (BID), Madrid, Spain
Actualidad Magazine, Madrid, Spain
The European Society for Quality Research (ESQR), Lausanne, Switzerland

Marrja e këtyre çmimeve shpesh inagurohet me festa, në të cilat, rëndom ftohen edhe politikanë.

Përgatiti: J.H

Një gazetar, i cili i ka mbijetuar burgut të Shtetit Islamik (IS) në Siri, ka treguar për Radion Iraku i Lirë, për torturat e tmerrshme dhe abuzimin psikologjik që ka përjetuar.

Louay Abdul-Jood, aktivist dhe gazetar sirian, është mbajtur nga militantët e Shtetit Islamik për gjashtë muaj. Ai është liruar kah mesi i vitit të kaluar, në bazë të një marrëveshjeje për shkëmbim të të burgosurve midis Ushtrisë së Lirë Siriane dhe Shtetit Islamik në Alepo.

Abdul-Jood dhe një kameraman i agjencisë franceze të lajmeve AFP janë rrëmbyer nga Shteti Islamik më 28 nëntor të vitit 2013, në një zonë të Alepos.

Në burg, Abdul-Jood ka thënë se ka njohur një numër të gazetarëve. Trembëdhjetë prej tyre kanë qenë të huaj, përfshirë dhe gazetarin James Foley.

Foley është ekzekutuar nga militantët e Shtetit Islamik në muajin gusht.

Abdul-Jood ka thënë se zyrtarët e burgut kanë qenë luftëtarë të huaj nga Franca, Tunizia, Maroku, ndërsa një rus i quajtur Khaled ka qenë përgjegjës për torturimin e të burgosurve.

“Shumica e të burgosurve nuk janë rrahur, por kanë qenë subjekt i metodave psikologjike. Atyre u është vënë një thikë pranë qafës dhe u është thënë se do të theren. Ky trajtim ka qenë i gjatë dhe ka pasur efekt më të madh se abuzimi fizik”, ka thënë Abdul-Jood për Radion Iraku i Lirë.

Rrëmbyesit e kanë akuzuar Abdul-Joodin se është laik dhe se i përket Ushtrisë së Lirë Siriane.

“Më kanë akuzuar se i përkas Unionit të Gazetarëve dhe se jam në një marrëdhënie mëkatare me një aktiviste”, ka rrëfyer Abdul-Jood.

Kur ai dhe disa gazetarë të tjerë janë transferuar në një burg tjetër, Abdul-Jood ka thënë se ka parë që të burgosurit e tjerë, jo gazetarë, kanë qenë të nënshtruar ndaj torturës ekstreme fizike.

“Për shembull, një burrë ka qenë i varur me kokë poshtë. Këmbët i janë prerë me makina të rrojes dhe mbi plagë i është hedhur alkool”, ka thënë Abdul-Jood.

Sipas tij, burgu që ka përdorur Shteti Islamik ka qenë fillimisht një depo e patateve në një zonë industriale. Ai ka thënë se të burgosurit janë mbajtur në qeli të izoluara, në errësirë totale.

“…pastaj, një burrë hynte dhe thoshte: ti do të vritesh, por jo sot. Nesër, me vullnetin e Zotit”, ka rrëfyer Abdul-Jood.

Ai po ashtu ka thënë se është dënuar me vdekje nga një gjyqtar me emrin Abu Ammar al-Massri, por Ushtria e Lirë Siriane ka kërkuar lirimin e tij si pjesë e marrëveshjes për shkëmbim të të burgosurve.

Militantët e Shtetit Islamik kanë rrëmbyr një numër gazetarësh sirianë dhe të huaj në Siri dhe Irak.

Grupi militant ka ekzekutuar dy gazetarë perëndimorë – amerikanët James Foley dhe Steven Sotloff – si dhe dy punëtorë të ndihmës – britanikun David Haines dhe amerikanin Abdul-Rahman Kassig.

Një tjetër gazetar britanik, John Cantlie, mbetet ende peng.

Sipas Reporterëve pa Kufij, gazetarët sirianë përbëjnë shumicën e 22 gazetarëve që po mbahen peng nga grupi i Shtetit Islamik.

Në fillim të dhjetorit është raportuar për rrëmbimin edhe të dy gazetarëve kurdë në kufirin Siri-Irak./REL

Në fund të vitit që lamë pas, gazetari Ardi Krasta, ka rimarrë monologun e nisur në muajin prill 2014, përmes të cilit ai paralajmëroi se një “luftë në kufijtë e absurdit” po bëhej për t’i marrë Radio Televizionit Publik Shqiptar një nga networket, e parashikuar për mbulimin dixhital të territorit.

Krasta ka rikthyer atë që ka thënë më herët, duke e plotësuar atë me fakte të ndodhura ndërkohë, e që të cilat konfirmojnë shqetësimin se tanimë, qëndrimi i kryeministrit ndaj RTSH-së është jo Rilindja e tij, as ripërdorimi, por dënimi me vdekje.

Sipas Krastës zgjedhja e drejtuesit të AMA-s është vetëm një hap në këtë proces që siç u shpreh ai ka nisur që ditën që Edi Rama hyri në kryeministrinë “e sapolyer” në një mbledhje “ku merrnin pjesë drejtues të platformave dixhitale në vend, por jo drejtori i Përgjithshëm i RTSH-së”.

Vetë gazetari në fjalë, duke folur nga studiot e “Agon Channel” i është referuar deklaratave të Sali Berishës që fliste për një mafie në këtë drejtim.

Sa e vërtetë është kjo gjë? Sa duhet ndarë ky term, me ngarkesë kriminale, nga termi tjetër Lobim?

Krasta nuk heziton të japë mendimin e vet:

“Lobimi, term të cilin në SHBA dhe në BE e kanë dekriminalizuar…i bashkuar me enturazhin e kryeministrit është diçka jo e bukur. Ka kolegë të mij që e kanë quajtur atë të rrezikshëm, siç kanë quajtur të rrezikshëm lobimin e kohës së kryeministrit Berisha…

Lobuesit dhe enturazhi i kryeministrit Rama, nuk mund të pranojnë të marrin më buzëqeshje për shkak të fytyrës fëminore, as gjuhëve të huaja që i dinë shumë mirë, as edhe talentit për të prodhuar shfaqje të hatashme marrëdhëniesh publike…

Po ç’do të thotë lobim në kufijtë e absurditetit? Do të thotë që lobimi shoqërohet me kërcënim për braktisje të kryeministrit, për nxjerrje sekretesh qeveritare të raison d’etat, për bjerrje të qëllimshme të imazhit dhe vetë rënien e tij të shpejtë politike”.

Dhe duke iu kthyer shqetësimit të shprehur në muajin prill, që parathoshte lojën e madhe që po zhvillohet për një nga networket dixhitale, që me direktivë të BE-së, dy i takojnë RTSH-së, Krasta ka deklaruar, në dritën e zhvillimeve disa mujore se:

“Natyrisht, kryeministrin e ka kapur një prej stacioneve televizive në vend. Këtë e dimë të gjithë…”.

Teknikisht kjo plandosje e RTSH-së do të realizohej sipas Krastës, në kushtet kur tenderi për dixhitalizimin në 11 lotuse të Shqipërisë, do të zhvillohej pa studim dhe përgatitje(vlen 22 milionë euro dhe është fituar nga Roxher Shvarz), duke sjellë dështimin e plotë.

Dhe me këtë rast do të duhej “ndërhyrja e privatëve”.

http://respublica.al/artikuj/2015/01/06/lobim-ne-kufijte-e-absurdit-adi-krasta-kryeministri-eshte-i-kapur-nga-ne-prej-sta

Dorian Bylykbashi është zyrtarisht lojtar i Partizanit.

Fantazisti 34-vjecar ka prishur me konsensus marrëveshjen me Elbasanin dhe do të federohet me të kuqtë për pjesën e mbetur të sezonit, raporton Sport News.

Përforcimi i dytë i merkatos së janarit, pas mbrojtësit Gëzim Krasniqi, i është bashkuar menjëherë skuadrës në stërvitje në kompleksin spotiv në Pezë Helmës.

Për elbasanasin firma me Partizanin mund të konsiderohet si rikthim në shtëpi, pasi në sezonet 2003 – 2006 ka qenë pjesë e të kuqve, teksa ka shënuar 41 gola në 91 ndeshje të kampionatit.

Në kulmin e karrierës së tij, Bylykbashi u transferua në Ukrainë te Krivbas, ku luajti për 4 sezone nga 2006 deri më 2010.

Zyra për shtyp e Partizanit njofton se prezantimi i Bylykbashit do të bëhet mesditën e kësaj të mërkure.

Lëvizjet në kampin e kuq në këtë merkato dimërorë ka qenë në të dy kahet, pasi nga skuadra janë larguar me konsensus bullgari Dishliev dhe kosovari Argjend Mustafa.

Lorik Cana rrezikon derbin e qytetit të përjetshëm.

Mbrojtësi shqiptar i Lacios është në dyshim për sfidën Roma-Lazio që do të luhet të dielën në orën 15:00.

Shkak për mungesën e mundshme të tij mund të bëhet dëmtimi që kapiteni i Kombëtares shqiptare pësoi në sekondat e fundit të pjesës së parë të sfidës kundër Sampdoria-s.

Pas ndërhyrjes ndaj brazilianit Eder, ai u ndëshkua me karton të verdhë.

Pas hyrjes në dhomat e zhvjeshjes situata nuk u duk alarmante por me rikthimin e skuadrës në fushë, Cana nuk doli nga tuneli për shkak të një dëmtimi në ijë dhe trajneri Stefano Pioli e zëvendësoi me belgun Kavanda.

Sipas mediave italiane, gjendja e 31-vjeçarit është shqetësuese, por ende nuk dihet me saktësi nëse do t’ia dalë për të qenë i gatshëm në sfidën më të rëndësishme të sezonit për skuadrën bardhekaltër.

Dëmtimi i Canas është një telash më shumë për trajnerin Pioli, i cili nuk ka në dispozicion as Xhentiletin, Cianin e Braafheid.

Në rast mungese të mbrojtësit shqiptar, vendin e tij në qendër të mbrojtjes do ta zejë rumuni Radu.

Gjithsesi, një përgjigje zyrtare trajneri do ta marrë nga stafi mjekësor sepse shpresat nuk janë shuar për ta parë kapitenin kuqezi në një prej ndeshjeve më të forta të sezonit.

Diego Armando Maradona “voton” Manuel Nojer për Topin e Artë.

Mund të duket e cuditshme, por është e vërtetë.

El Piebe De Oro mendon se portieri i Bajernit të Mynihut e meriton këtë cmim prestigjioz para Lionel Mesit dhe Kristiano Ronaldos.

Në fakt në cdo prononcim të mëparshëm 54-vjecari ka ngritur në qiell bashkëkombasin e tij të Barcelonës, por performancat dhe trofetë që Nojer ka fituar gjatë 2014 e kanë bindur se Topi i Artë duhet të shkojë për portierin e kombëtares gjermane.

“Kush është favorit për Topin e Artë? As Mesi dhe as Ronaldo.

Për mendimin tim, Nojer e meriton më shumë.

Mendoj se Mesi dhe Ronaldo gjatë 2014 nuk kanë bërë aq sa duhet për ta fituar këtë çmim”, tha Maradona.

Ikona e Argjentinës mendon se suksesi në Kupën e Botës bën diferencën, ndaj Nojer duhet ta fitojë Topin e Artë.

Portieri i parë dhe i fundit që e ka fituar këtë trofe ka qenë rusi Lev Jashin në vitin 1963.

Ceremonia e shpërndarjes së çmimeve për 2014 do të zhvillohet më 12 janar në Zyrih të Zvicrës.

Rexhep Qosja e ka nisur vitin e ri 2015 me beteja të vjetra.

Ai sërish është marrë me Akademinë e Shkencave dhe Arteve, LDK-në, dhe kryetarin e saj, Is Mustafa, i cili rreth një muaj më parë u bë edhe kryeministër i vendit.

Shkrimtari dhe akademiku i ka reaguar shkrimtarit Mehmet Kraja i cili në shkrim të tij “Kosova dhe Shqipëria në katër pamje” Qosjen në mënyrë pezhorative e përmend si “baba të kombit”, ndërsa e cilëson edhe si një nga autoritetet fiktive të Prishtinës, raporton Express.

Qosja në reagimin e tij, Krajën e quan zëdhënës të Akademisë së Shkencave dhe Arteve të Kosovës.

Sipas Qosjes, shkrimi i Krajës është në “një artikull programatik” i ASHAK, por i nënshkruar nga Mehmet Kraja.

Ndaj shkrimit të Qosjes “Ideloogjia e prapavajtjes” ka reaguar ASHAK ku thuhet se ky institucion nuk ka asnjë lidhje me shkrimin e Mehmet Krajës “Kosova dhe Shqipëria në katër pamje”, i botuar para disa ditëve.

“Shkrimi i Krajës është autorial dhe anëtarët e Akademisë kanë mundur ta lexonin si të gjithë lexuesit e tjerë. Qosja, si dezinformues kujdestar dhe urrejtës patologjik i Akademisë, privilegjet e së cilës i gëzon si të gjithë anëtarët aktivë të saj, ndonëse nuk e ka shkelur pragun e saj tash e 15 vjet, mund t’i drejtohet vetëm Mehmet Krajës dhe pikëpamjeve të tij personale në shkrimin e përmendur”, thuhet në një komunikatë të Akademisë.

Por në reagimin e tij, Qosja nuk është marrë vetëm me Krajën dhe ASHAK-un.

Ai aty sërish ka përmendur kryeministrin Isa Mustafa, të cilin sërish e ka quajtur zyrtar të dikurshëm të Sllobodan Milloshevicit.

Ndërkohë që nuk ka lënë pa thumbuar as LDK-në, që sipas tij do t’i anëtarësijë edhe kafebërësit dhe procesmbajtësit në ASHAK.

Kozeta Kurti, gazetare e TVSH-së, është arrestuar në Bergamo, pasi dyshohet se ka vjedhur produkte kozmetike në një supermarket.

Vlera e këtyre produkteve shkon 400 euro.

Lajmi bëhet me dije nga “L’Eco di Bergamo”.

Mësohet se Kurti është arrestuar së bashku me tre shqiptare të tjera.

Por, ajo ka thënë se nuk ka lidhje me vjedhjen.

“Nuk kam lidhje me akuzën, jam gazetare në Shqipëri, drejtoj një program si “Striscia la notizia” te ju”, ka thënë Kurti.

Sipas policisë, vjedhja ka ndodhur më 5 janar në supermarketin ‘Montebello di Brembate’.

Kozeta Kurti aktualisht punon në TVSH, ndërkohë që ka punuar në disa televizione shqiptare./b.l

Emiljano Shullazi është marrë në pyetje pas atentatit që iu bë mbrëmjen e djeshme atij dhe shokut të tij, Gilmando Dani.

Ai ka thënë se nuk ka konflikt me asnjeri dhe nuk ia ka idenë se kush ka dashur ta vrasë.

Ndërkohë, ai ka mohuar edhe armët që janë gjendur në makinën me të cilën udhëtonte me mikun e tij.

Sipas Shullazit, ato mund të jenë të personave që tentuan ta vrasin.

“Nuk kam konflikt me njeri dhe nuk e di kush ka dashur të më vrasë.

Armët nuk janë tonat.

Mund të jenë të atyre që na qëlluan apo personave të tjerë”, ka thënë Shullazi.

Ai ndërkohë ka mohuar të ketë lidhje apo dijeni me ngjarjen e ndodhur në “Rrugën e Kavajës”./b.l

Kryeministri Edi Rama ka reaguar për disa nga ngjarjet e fundit të ndodhura në vend, duke nisur me videoskandalin në QSUT dhe përplasjet me armë në Tiranë.

Ai ka thënë se këto ngjarje janë turpshme dhe të dënueshme, por shteti ka reaguar në kohë.

Ai ndërkohë ka akuzuar opozitën se po shpif në mënyrë monstruoze.

“Videoja e xhiruar në mjediset e QSUT? E turpshme dhe e dënueshme! Reagimi i shtetit i menjëhershëm. Autorët po vihen përpara përgjegjësisë penale.

Rasti i truprojes së ministres që kërkoi rryshfet për të emëruar një mësues? I turpshëm dhe i dënueshëm. Reagimi i shtetit i menjëhershëm. Autori i larguar brenda orës nga minstrja dhe pastaj edhe nga Garda e Republikës. Sot përpara përgjegjësisë penale.

Ngjarjet kriminale në Tiranë? Pa asnjë dyshim reagimi i shtetit ishte përsëri i menjëhershëm. Por ndryshe nga dy rastet e mësipërme, kërkohen hetime, prova, dëshmi e me radhë, gjëra për të cilat Policia e Prokuroria po bashkëpunojnë papushim.

Të turpshme të gjitha aludimet e shtrembërimet mediatike dhe lëre pastaj shpifjet monstruoze të PD!

Përpjekja për të bindur opinionin se krimi po bën kërdinë deri dhe në mes të Tiranës, përveçse me gjendjen e pashpresë të PD lidhet në fakt, drejtëpërdrejt, edhe me arritjet serioze të Policisë së Shtetit. Flasin shifrat, flet puna, flet rritja e respektit të qytetarëve për uniformat blu.

Ngjarje të rënda apo të shëmtuara, krimesh apo korrupsioni, ka pasur e do të ketë, në Shqipëri si në çdo vend të Europës.

Por ajo që ka rëndësi është reagimi i shtetit, rritja e zbulueshmërisë dhe ndëshkueshmërisë – çka sot janë rritur si kurrë më parë duke sjellë ulje tërësore të kriminalitetit, edhe pse mbetet ende shumë për të bërë. Pikërisht në këtë drejtim do të vazhdojmë të punojmë shumë fort për të arritur parametrat e rajonit e pastaj BE-së lidhur me nivelin e krimit dhe korrupsionit.

Sa për informacion: Këtë vit Policia e Shtetit do të fillojë ta bëjë krahasimin e rezultateve jo vetëm me të shkuarën, por edhe me të njëjtën periudhë në rajon. Matja me të shkuarën nuk mjafton më për ne, që llogaritë në fund të mandatit duam t’i bëjmë me standardet e BE! Ndërsa sa për ata që nga dritare të ndryshme hedhin sot gurë, mbi qeverinë e policinë për nivelin e krimit, është e qartë se jo vetëm nuk shohin apo nuk duan të shohin rezultatet e padiskutueshme në luftën kundër krimit, po mbase kanë humbur edhe kujtesën për çka ndodhte përditë vetvm deri 18 muaj më parë në Shqipëri. Se për PD kot të flasësh, dihet halli i shqupatarëve”, thotë Rama./b.l

NATO ka reaguar menjëherë pas sulmit terrorist të AL Qaeda-s në zyrat e revistës “Charlie Hebdo”,  duke shprehur mbështetjen e Aleancës ndaj Francës.

Sekretari i Përgjithshëm i NATO-s , Stoltenberg ka deklaruar se dënon fuqishëm sulmin terrorist, të cilin e ka quajtur barbarë  dhe një sulm të paprecedentë ndaj lirisë së medias.

” Me zemër jam pranë  viktimave dhe famijeve të tyre. Aleati ynë, Franca ka mbështetjen tonë të plotë. Gjithë vendet anëtare të NATO-S, qëndrojnë bashkë në luftën kundër terrorizmit. Terrorizimi dhe gjithë  format e tij të manifestimit nuk do të  tolerohen kurrë apo justifikohen”,- dekalaroi Sekretari i Përgjithshëm i NATO-s ./j.h

Lideri i Bashkimit Demokratik për Integrim, Ali Ahmeti vazhdon të brengoset për fatin e Maqedonisë, raporton KTV.

Ai ka filluar takimet e para me komunitetin ndërkombëtar për këtë vit me shqetësimin kryesor çështjen e emrit dhe integrimin euroatlantik të vendit.

Në një takim me ambasadorin e SHBA-ve në Shkup, Poll Walers, Ahmeti ka kërkuar ndihmën e Uashingtonit zyrtar për integrimin e Maqedonisë në NATO dhe BE.

Sipas tij, pas përfundimit të zgjedhjeve të parakohshme në Greqi dhe formimit të qeverisë së re në Athinë, të gjitha palët, Maqedonia, Greqia dhe komuniteti ndërkombëtar, duhet që të fokusojnë të gjitha forcat drejt tejkalimit të kontestit që po mban Maqedoninë larg nga Brukseli.

Ahmeti ka ftuar Shtetet e Bashkuara të Amerikës që të intensifikojnë përpjekjet këtë pranverë sepse pa ndërhyrjen e Washingtonit, nuk do të ketë zgjidhje për emrin. Ahmeti ka ftuar përsëri opozitën që të rikthehet në kuvend dhe të kontribuoj për të ardhmen e vendit.

“Ne të katërt, mbrëmjen e të hënës, ishim duke festuar, kur një person që nuk e njihnim u afrua drejt nesh. Ai qëlloi drejt Pajtim Serjanit, por Pajtimi u largua me vrap. Në këtë çast atij nuk i shkrepi arma dhe Roland Meta, nxorri pistoletën. Thirri: Ndal, Policia e Shtetit! dhe pastaj qëlloi”.

Ky eshte rrefimi i te mbijetuarve nga atentati ne Rrugen e Kavajes, kur sipas deshmive paraprake te Denis Ramanit dhe Ditmir Reçit, viktima Arjanit Sterio te cilin ata nuk e njohnin dhe as kane patur konflikt me te, ne momentin qe ka qelluar per pak çaste nuk i ka shkrepur arma.

Prokuroria thote se per vrasjen e te dyshuarit nje 42-vjeçar me te kaluar te panjohur, do te akuzohet ne gjykate efektivi Roland Meta, i cili aktualisht eshte ne gjendje te rende per jeten per shkak te plageve qe ka marre ne stomak nga shkembim i zjarrit. Efektivi i policise nuk ka qene ne krye te detyres thone burime te Prokurorise dhe ngjarja nuk ka ndodhur per shkak te detyres se tij.

Nga ana tjeter, personi qe ishte nisur per te vrare por mbeti vete i pajete, shtetasi Arjanit Stereo, njihet edhe me emrin Artur Baze.Ai rezulton se eshte deportuar pak kohe me pare nga Greqia drejt Shqiperise per vepren penale te kalimit te paligjshem te kufirit. E kaluara e 42-vjeçarit nga Çorovoda e me banim ne Tiranë eshte ende e paqarte per Prokurorine, edhe pse jo zyrtarisht thuhet se ai ka qene vrases me pagese. Trupi i te ndjerit eshte terhequr nga morgu nje dite pas krimit, mbremjen e te martes.

E ndersa kjo çeshtje po hetohet nga prokurori Florian Bonjaku i cili do te shkoje ne gjykate per te kerkuar arrest me burg per efektivin Meta, Prokurori tjeter Kolë Hysenaj po heton ngjarjen e Kasharit, ku u tentua te vritej nje emer i njohur vitet e fundit per drejtesine e policine.

Grupi i hetimit thote se eshte identifikuar pronari i automjetit me te cilin udhetonte Emiljani Shullazi dhe Gilmando Dani, ai eshte nje person nga Durresi me inicialet T. Berisha. Por burimet e prokurorise presin pergjigje nga laboratori i kriminalistikes per te konfirmuar se nga çfare lloj armesh jane shtene gezhojat e sekuestruara ne vendngjarje, ne menyre qe t’i japë pergjigje pyetjes nese Shullazi dhe Dani kane patur apo jo armë me vete./TCH

Ngjarja e rëndë që ndodhi në Francë ka bashkuar në një zë të vetëm, liderat kryesorë të botës kundër terrorizmit.

Presidenti francez ishte i pari që foli  para zyrave të Charlie Hebdo, duke thënë se sulmi ishte vepër barabare e njerëzve të sëmurë. Pas tij  Kryeministri Manuel Valls  tha se deri më sot Franca “nuk është përballur kurrë me një kërcënim kaq të lartë nga terrorizmi”.

Pas tij liderat Perëndimor dënuan aktin terrorist të marrë përsipër nga AL-Qaeda, ku deri tani numërohen 12 të vrarë, 2 policë dhe  10 gazetarë në zyrat e revistës satirike.

Kryeministri Britanik David Cameron  tha se kjo ishte një ngjarje prej të sëmurësh. “Ne qëndrojmë me Francën dhe popullin francez në këtë moment të vështirë”, shkroi Cameron në Twitter.

Ndërsa kancelarja gjermane Angela Merkel  e ka përshkruar masakrën si një “akt të neveritshëm“, i cili është jo vetëm një sulm mbi jetën e qytetarëve francezë dhe sigurinë e tyre.

“Është gjithashtu një sulm ndaj lirisë së fjalës dhe shtypit, elementet thelbësore të kulturës tonë të lirë demokratike. Në asnjë mënyrë  kjo nuk mund të justifikohet“, është shprehur kancelarja gjermane.

Për masakrën ka reaguar edhe kryeminsitri kanadez,  Stephen Harper, i cili ka thënë : “Jam i terrorizuar nga sulmi barabar në Francë. Lutjet  tona janë për viktimat dhe fmailjarët e tyre”

Matteo Renzi ka thënë se “horrori dhe lemeria pushtoi rrugët e Parisit. Shprehim mbështetjen tonë për Francois Hollande dhe Anne Hidalgo në këtë moment të tmerrshëm. Dhuna do të humbasë gjithmonë, përkundrejt lirisë dhe demokracisë”, ka thënë kryeministri italian.

Një tjetër lider që ka reaguar për sulmin është edhe presidenti rus Valdimir Putin,  i cili u ka  dërguar ngushëllimet e tij viktimave të revistës franceze.

“Moska dënon terrorzimin dhe  të gjitha format e tij” , –  u shpreh zëdhënësi i Putinit, Dmitry Peskov “Putin u shpreh ngushëllimet e tij, gjithë të prekurëve dhe familjarëve të viktimave të sulmit terrorist dhe gjithë Francës”.

Dy burra të maskuar, dhe të armatosur me kallashnikov  hyn në zyrat e revistës satirike “Charlie Hebdo” në Paris, duke shkaktuar një masakër. Sipas mediave deri tani raportohet për 12 të vdekur, 10 gazetarë dhe dy policë si dhe më shumë se 20 të tjerë  të plagosur.

Revista ” Charlie Hebdo”, është sulmuar edhe më parë me bombë, në vitin 2011 pasi  ka publikuar karrikatura tallëse të liderëve myslimanë.

Një dyshim, është se sulmi i sotëm mund të lidhet pikërisht me punën e revistës satirike, pasi gati  15 minuta përpara sulmit, ajo kishte publikuar në profilin e saj në “Twitter” një karikaturë të liderit të ISIS, Abu Bakr al-Baghdadi. Përgatiti: J.H

Njeriu që besoi shumë tek Adnan Januzaj shikon hijen e legjendës Johan Krujf te talenti i Mançester Junajtid.

Dejvid Mojes, i cili tani po kërkon ta huazojë 19-vjeçarin te Sociedadi, tha për revistën “Four Four Two”:

“Disa talente i mbivlerësojnë, por kjo nuk vlen për Adnanin.

E kuptova që do bëhej i madh vetëm pas disa minutash në stërvitje.

Nuk ishte i ndrojtur dhe kishte arrogancën e nevojshme.

Kur e shoh, më kujton karakteristikat e Krujfit”.

 Nga Agustin Palokaj*

Kur kryeredaktori Agron Bajrami na kishte dërguar një email qarkullor, duke na tërhequr vërejtjen se Viti i Ri po afrohet, e koha për kolumnet e Vitit të Ri edhe më shpejt, reagimi i parë ishte: “A është ai normal!” Jo pse, si gjithmonë, kërkon që shkrimet të dërgohen “sa më parë”, por pse kësaj radhe kishte insistuar që të mos shkruajmë për “ata” dhe të mos i përmendim në asnjë mënyrë në shkrimet për numrin festiv, sepse ky numër do t’u kushtohet qytetarëve dhe atyre nuk do t’u prishet festa, duke i përmendur “ata”, me të cilët tërë vitin merren mediet.

Por, kur nisa të mendoj se çfarë do të mund të shkruaj, e të mos i përmend ata, m’u kujtua pyetja e para shumë vjetësh e një miku: “A jeni ju normalë? A dini ju gazetarët të flisni diçka tjetër pos për pol…” Vërejtje të tilla se “A jemi normalë?” kemi marrë shpesh, kryesisht nga miqtë të cilët nuk janë kosovarë, nuk janë as nga rajoni. Sepse, nëse je shqiptar, apo nga cilido vend tjetër i rajonit, nuk ka rëndësi se çfarë profesioni ke: nuk di të flasësh për gjërat e tjera pa i përmendur “ata” dhe profesionin e tyre.

Për ta flasim kur pimë kafenë e mëngjesit, për ta flasim kur pimë birrë pas ndeshjes së futbollit, për ta flasim kur shkojmë mysafirë te ndonjë mik sapo t’i kryejmë formalitetet “Si jeni…? Si e keni familjen…?”, për ta flasim me miqtë edhe në festat e ditëlindjes, për ta flitet edhe në kryeshnosh (të pame), ndërsa nëpër dasma dhe syneti jo vetëm që flitet për ta, por shpesh edhe u këndohen këngë. Jo rrallë u jepet mikrofoni për t’i nderuar të pranishmit me ndonjë porosi të tyre. Për ta flet me taksistët sapo t’i tregosh se cili është destinacioni, për ta flet në autobus, në çajtore apo kafene, në oborre të kishave apo xhamive pas ceremonive fetare, e besa edhe gjatë predikimeve.

“Ata” nuk janë jashtëtokësorë, Ata duken sikur edhe ne dhe shpesh na thuhet se janë pjesë jona. Ose se kanë dalë nga “gjiri i popullit”. Punën e tyre, përmes së cilës përfitojnë, pasurohen dhe marrin shumë privilegje e quajnë “sakrificë për qytetarët”. Ata thuhet se “i kanë rrogat e vogla, por të ardhurat shumë të mëdha!” Ata në Kosovë janë bërë zot të fatit të dikujt. Pa ta, apo në lidhje me ta, është vështirë të gjesh vend pune, të bësh ndonjë biznes të suksesshëm, të regjistrohesh në shkollën e dëshiruar. Ose duhet të kesh lidhje me ta ose të bëhesh pjesë e tyre.

Nuk mund të aktivizosh televizorin e të mos dalin menjëherë “Ata” nga ekrani. Jo vetëm në emisionet e lajmeve apo debateve polit…, që në shtëpitë e familjeve kosovare nga njëri kanal në tjetrin shikohen nga mëngjesi deri në mbrëmje, por edhe në emisione ndërmjet lajmeve. Edhe kur shikon futboll, kamera i kap ata diku në stadium. Edhe kur shikon ndonjë emision zbavitës dalin ata diku, ose përmenden. Edhe kur ka ndonjë reportazh për promovimin e ndonjë libri, hapjen e ndonjë ekspozite apo premierën e ndonjë shfaqjeje teatrale, nuk bën pa i parë ata dhe pa dëgjuar mendimin dhe vlerësimin e tyre. Ata janë të gjithanshëm.

Krejt kjo na tregon se jeta jonë vërtet nuk është normale dhe ajo ka tepër vlerë për të humbur aq shumë kohë duke u marrë me ta. Por ata kanë arritur të depërtojnë në çdo pore të jetës së qytetarëve. Kur ata të cilët nuk përmenden në këtë numër të gazetës të mos jenë aq shumë në mendjet tona, në bisedat tona, në shqetësimet tona, atëherë do të thotë se e kemi jetën më normale. Ironia është se edhe ata do të donin që nganjëherë ne të mos merremi me ta. Do të donin që vetëm të votojmë për ta, t’i lavdërojmë për meritat e tyre, por jo edhe të zgjojmë dyshime në sakrificat e tyre që i bëjnë për popullin.

Unë në këtë numër të kësaj gazete e kam respektuar kërkesën e kryeredaktorit. Nëse urdhri i tij ka qenë diçka që nuk ka bërë kurrë – “censurë” – atëherë unë në këtë shkrim kam bërë atë të vetmen që bëjnë shkruesit në censurë, t’i iki asaj tërthorazi duke folur për “temën e ndaluar” pa e përmendur atë formalisht. Unë në vazhdimin e karrierës sime do të vazhdoj të merrem me ta, aq sa do të jetë e nevojshme. Por u premtoj miqve se në jetën private, në aktivitetet e lira, në ndeja, do të bëj çmos që t’i përmend sa më pak.

Madje edhe kur të takohem me ta, sepse edhe në mesin e tyre kam miq, sepse edhe ata janë njerëz. E ata kur të merren me atë profesionin e vet, le të bëjmë çmos që ta ruajnë njerëzinë e të mos japin kontribut për ta konfirmuar thënien se ai profesion i prishë njerëzit. Qytetarëve me këtë nuk dua t’ua prish festën, por vetëm t’u uroj gjithë të mirat në Vitin e Ri dhe që “ata” dhe profesioni i tyre të jenë sa më pak të pranishëm në jetën e qytetarëve. Pra të kenë një jetë më të hareshme, me më pak brenga, më normale.

*Koha Ditore