Kryetari i Partisë Demokratike Lulzim Basha akuzon Kryeministrin Edi Rama se pavarësisht kërkesave dhe pyetjeve të qytetarëve nuk po përgjigjet se sa do të jetë rritja e çmimit të energjisë.
Në një postim në rrjetin social Facebook, Basha thotë se Rama duhet të hapë vende pune e të mos hapë plagë sociale, në vend që të thotë se do t’i bashkëkohet protestave në rast rritje të çmimit të energjisë.
Sipas Bashës, kryeministri Rama nuk po mban premtimet e bëra gjatë fushatës elektorale për ulje të çmimit të energjisë elektrike.
“Kryemashtruesi na bën moral! Ka 2 muaj qe luan kukafshehthi me ministrin e tij te Energjisë dhe nuk i përgjigjet pyetjes se shqiptareve: Sa do rritet çmimi i energjisë?
Shqiptaret nuk harrojnë se ne fushate premtoi se do ta ulte çmimin e energjisë; Por OSHEE dhe Ministria e Energjetikes, te dyja nen komandën e kryeministrit kane kërkuar rritje te çmimit. Kryemashtruesi dhe megafonat e tij e quajnë mesatarizim.
Lëri lojërat me nervat e sfilitura te njerëzve qe po vuajnë! Ule çmimin e energjisë siç premtove! Mos rrit taksat! Hap vende pune dhe jo plage te reja sociale!
Përndryshe mos u lodh të vish në protestë. Po vjen protesta tek ty! Më e madhe se kurrë më parë!”, shkruan Basha. /gj.k/